Татарстанда ике һәм күбрәк бала тәрбияләүче эшләүче ата-аналар, гаиләнең җан башына туры килә торган кереме төбәктәге яшәү минимумыннан 1,5 тапкырдан күбрәккә артмаса, алдагы елда түләнгән салымының бер өлешен кире алырга мөмкин. Бу хакта “КП-Казань” яза.

Еллык түләү эшләүче ата-аналарга, уллыкка (кызлыкка) бала алучылар, опекуннарга бирелә. Аларның салымы 6 процент буенча исәпләнеп, калганы кире кайтарыла. Шартлары: гаиләнең барлык әгъзалары Россия гражданнары булып торырга, алимент буенча бурычка ия булмаска тиеш.

Ата-ана хокукыннан мәхрүм ителүчеләр, рәсми төстә эшләмәүчеләр еллык түләүгә өметләнә алмый. Узган елдагы керемнәрне исәпкә алып, 1 октябрьгә кадәр гариза тапшырырга мөмкин. Түләүне Дәүләт хезмәтләре порталы, Күпфункцияле үзәк аша яки Социаль фондның клиентлар офисларында рәсмиләштерергә була.

Сүз уңаеннан, хәзерге вакытта Татарстанда “Гаилә” илкүләм проекты гамәлгә ашырыла.