Республика Рәисе хәбәр иткәнчә, «Иннопром. Central Asia» халыкара күргәзмәсенә Татарстаннан зур делегация килгән. «Без күргәзмәне тугандаш Үзбәкстан белән хезмәттәшлекне ныгыту өчен мөһим мәйданчык дип саныйбыз», – дип ассызыклады Рөстәм Миңнеханов.

Ул шуны да билгеләп үтте, Татарстан хакимияте Үзбәкстан Хөкүмәте әгъзалары белән даими элемтәдә тора: «Соңгы елларда безнең үзара хезмәттәшлек дәрәҗәсен һәм динамикасын бик югары бәялим».

Аерым алганда, Татарстан Рәисе республика предприятиеләренең үзбәк базарында күпләп урын алуга игътибар итте. Бу машина төзелеше, нефть тармагы, медицина һәм башкалар.

Абдулла Арипов, Рөстәм Миңнехановны сәламләп, халыкара күргәзмәдә катнашу өчен Татарстаннан килгән вәкиллекле делегация өчен рәхмәт белдерде. «Безнең хезмәттәшлеккә шәхси игътибарыгызны югары бәялибез. Сез яшь бизнесменнарны үзегез белән алып киләсез һәм алар өчен Үзбәкстан мөмкинлекләрен ачасыз, бу хезмәттәшлекне үстерүгә ярдәм итә һәм ике ил икътисадына файдалы. Сез бик тәҗрибәле кеше. Күп нәрсәләрне күргәнсез һәм һәрвакыт яхшы, файдалы тәкъдимнәр бирәсез», – дип билгеләп үтте Үзбәкстан Премьер-министры.

Уртак эш нәтиҗәсендә Җизак һәм Чирчикта зур проектлар гамәлгә ашырыла. Соңгы сәнәгать зонасында инде 28 предприятие эшли.

Рөстәм Миңнеханов искәрткәнчә, май аенда традицион рәвештә «Россия – Ислам дөньясы: KazanForum» халыкара икътисади форумы узачак. «Узган елны Форумда Үзбәкстанның вәкиллекле делегациясе булды. Сезнең илнең югары делегациясен чираттагы чарада күрергә шат булырбыз», – дип йомгаклады Рөстәм Миңнеханов.